Hau idazterakoan, egitaraua guztiz zehaztu gabe bazegoen ere (inauterietan egitaraurik bada), asteburu honetan ospatuko dituzte inauteriak Beintza-Labaienen ere. Egun handia larunbata izaten da, baina ostiralean bilduko dira gazteak afaltzera eta lehenbiziko mozorroak ere bertan ikusiko dira. Urtero bezala, Labaiengo Herriko Ostatuan eta Iturrondo elkartean eginen dituzte otorduak. Larunbatean ere, ongi gosaldu ondotik, etxez etxeko puxka biltzea eginen dute akordeoilariaren laguntzarekin. Ezin zitekeen bertzela eta eguerdian, aizkora apustua ere plantatuko dute, nahiz eta oraindik ez jakin aizkolariak zein izanen diren. Goizean eskean bildutakoarekin bazkaldu eta arratsaldean herri inguruan eginen dute puxka biltzea, gero berriz ere mahaiaren bueltan, afaltzeko.