Gorka Urtasun iruritarrak hirugarren aldiz segidan irabazi du Eguberrietako frontoi laburreko buruz buruko erremonte txapelketa. Urtarrilaren 6an Labriten jokatutako finalean 30-23 irabazi zion Zeberio II.ari eta txapel hau hirutan irabazi duen lehen erremontelaria da.
Piloteoan partida berdindua izan zen finala, baina sakean hobe moldatu zen Urtasun. 15-12koa arte alde ttikiak izan ziren, bizpahiru tantukoak, baina 20-14 aitzindu zen iruritarra. 24-22ra hurbildu zen Zeberio II, baina 27-22 eta 28-23koaren ondotik, azken bi tantuak Urtasunek egin zituen. Baztandarrek giro ederra paratu zuten frontoian eta harmailak bete xamar ageri ziren.
Jaialdiko lehen partidan, Ezkurra II eta Olazar Doneztebeko lehengusuek 30-15 irabazi zieten Etxabe II eta Zubizarreta gipuzkoarrei. Hirugarren partidan, Urriza eta Barrenetxea IV.ak 40-38 irabazi zieten Endika eta Etxeberria III.ari.