Urraska, Goazen eta Taupadak ikusgarrien ondotik, Pascale Lazkano dantzariak ikusgarri berria muntatu du Zarena Zarelako konpainiarekin: Ainarak. Munduko lehen gerla baino lehen Nafarroa eta Aragoitik Zuberorat joaten ziren neska gazteen istoriak aipatzen ditu euskal dantzaren urratsetan eta piska bat antzerkian oinarritua den ikusgarri berriak. Neska hauek bortxaz joaten ziren ezpartinak lantzerat Zuberorat eta mendi elurtuen barna ibili behar zuten Pirineotako alde batetik bertzerat. Dena den, Pascale Lazkanoren erranetan beti alaiak ziren. Emazteen historia hauek biziki gustukoak ditu koreografoak eta omenaldia egin nahi izan die. Gertakari horiekin abiatuz, ikusgarri oso osoa asmatu du: urratsak, jantziak, argiak eta musika, bertzeak bertze Benoit Lamerain eta Maitena Duhalde musikariekin.
Oinak aski arinak dituzten 13 neska eta 7 mutil dabiltza taulen gainean, hauen artean senpertar andana. 2011ko udazkenean hasi ziren proiektu berri hau apailatzen Pascale Lazkanoren zuzendaritzapean. Aldi honetan, Pascale bera ez da ikusgarrian agertzen argipean baina gazteei laguntza haundia ematen die ilunpean, aldageletan. Hortxe, urduritasun haundia sentitzen du maiz, baina oro har, den dena behar den bezala iragaiten dela dio. Momentu biziki atseginak bizitzen ditu Pascalek gazte guzi horiekin. Sei urtetan hasi zen euskal dantzak ikasten bere sorterrian, Getarin, Lapurdi kostaldean eta orain biziki gustatzen zaio bere zaletasuna bertzeei irakastea eta transmititzea. Egunero oinak mugitzen zaizkio beti eta bertsulariek hitza beti gogoan duten bezala, harek urratsak ditu buruan. Urrats zaluekin Zarena Zarelako konpainia Ipar Euskal Herri osoan eta baita ere Ameriketako Estatu Batuetan aritu da ikusgarriak eskaintzen.
Abendu erditsuan, Luhuson egin zen ikusgarri berriaren estrenaren ondotik, orain Ainarak erakutsiko dute Hazparnen urtarrilaren 26an eta Miarritzen martxoaren 2an. Ondotik, ikusgarri gehiago eskaintzeko prest da Zarena Zarelako konpainia, eta plazerrekin joanen litzateke hego Euskal Herrirat…