Ezkurra, herri berezia liburuan 1936ko gerraren inguruko pasarte bat biltzen da. Horren arabera, 73 gaztek hartu zuten parte: 19 zauritu, 3 mutilatu eta 4 hildako izan ziren.
Pasarte horretan guztien izenak agertzen dira eta gerrak eragin zizkieten ondorioen inguruko xehetasunak ematen dira. 73 horietatik 4k hierarkia militarrean graduak lortu zituzten. Gerra amaitzean, gehienak herrira itzuli ziren, baina bik Francoren ejerzitoetan eta erakunde ofizialetan parte hartzen segitu zuten.
Miguel Mariezkurrena izan zen horietako bat. Burgos, Okaña eta El Duesoko gartzeletako zuzendaria izan zen eta amaieran inspektore generala. Gerrak ondorioak ere jasan zituen: izterrean zauritu zuten, hatz bat galdu zuen eta lepoan, aurpegian eta eskumuturrean su-armaz zauritu zuten.
Miguel Garziarena berriz, bolondres joan zen 21 urterekin gerrara. Alferez gisara hasi zuen bidea eta gero militar izatera iritsi zen, koronel gradua lortu eta Donostiako polizia munizipalen nagusia izatera iritsi arte.
Juan Elizalde ere, alferez eta gerrako mutilatua izan zen. Ezkurrako alkate izan zen urte askotan. Bere balentrien artean, 1956ko urtarrilaren 11n, herriko tarbernariei idatzi zien eskutitza dago. Bertan agarrao dantza egitea debekatzen zuen, «dantza exotikoa, arrotza eta moralik gabekoa» zelakoan.