Sagardotegia eta sagardoa egiteko prozesua hurbiletik ezagutzeko aukera dute Irungo Ola sagardotegiko bisita gidatuetan. Bi bisita gidatu jarri dituzte aukeran. Bata sagardotegia eta sagardogintza gainetik erakusten dituena da eta bertzea sakonago ezagutzeko aukera ematen duena. Erreserba aurretik egin behar da, 943 623130 telefonora deituta.
Bisitarik luzenak ordu eta erdiko iraupena du. Ola burdinolaren historia ezagutzetik hasi, eta sagardoaren elaborazio prozesu osoa ikusteko aukera ematen da. Sagastietatik hasi, tolarean jarraitu eta upeltegian akitu arte, pintxo bat dastatuz. Euskaraz, gazteleraz, frantsesez edo ingelesez egin liteke bisita, asteartetik ortziralera 11:30ean, gutxienez 20 laguneko taldea osatuta.
Bisita laburrago bat egin nahi dutenek, ordu erdiko iraupena duen bisita dute aukeran. Euskaraz edo gazteleraz egin liteke bisita, asteartetik ortziralera 13:00etan edo 20:00etan egin liteke.
Bisitaren ondotik, bertan bazkaldu edo afaltzeko gogoa izanez gero, eskaintza bereziak jarri dituzte. Bisita eta eguneko menua, 18 euroren truke, bisita eta sagardotegiko menua 35 euroren truke edo haurrentzat pentsatutako bisita eta menua 12 euroren truke.