Abenduaren 26, 27 eta 28an, Malerreka, Baztan eta Bortzirietako 20 gazte inguru Iturengo Herriko etxeko gelan bildu ziren Gazte Zukgua prozesu eratzaileko hirugarren zatia elkarrekin lantzeko. Eztabaiden artean umore eta jolasik ez zen falta izan eta bertan parte hartu zuten gazteek, “indarberriturik” atera direla erran digute.
Asteazken gauean, azken 30 urtetako gazte mugimendua laburbiltzen duen Tximeletak dokumentala ikusiz hasi ziren. Ortzegun osoa pasa zuten gazte estrategia definitzen, ariketa eta eztabaiden bidez, izan talde ttikika edo denok batera : mugimendua eta antolakundea, borroka moldeak, komunikazioa… gai aunitz izan zituzten eztabaidagai. Ortziral goizean azkenik, gazte antolakundearen egitura zehaztu zuten. Gazteek “esperientzia hagitz positiboa” izan dela diote, “eskualdeko gazteekin harremandu eta elkarrekin eztabaidatzeko txoko bat” sortu dutelako. Gainera, ederki jan zutela erran digute, ekarritako bazkari zein haiek prestatutakoekin, eta nola ez, fruta nahi adina!
Prozesua bukatzear dela oroitarazi digute, martxoaren 2an izanen baita kongresua eta martxoaren 29, 30, 31 eta apirilaren 1ean Gazte Danbada jaialdiarekin ongi etorria emanen zaio gazte antolakunde berriari.
IPARRALDEAN ERE GAZTEAK ANTOLATZEN
Kilika gaztetxean Iparraldeko gazte dinamika berriaren aurkezpena egin zuten urtarrilaren 11n, Sara, Senpere eta Azkaineko gazteen eskutik. Izan ere, Hego Euskal Herrian gazte zukgua prozesuarekin dabiltzan moduan, Ipar Euskal Herrian ere mugimenduan dabiltza gazteak, Gazte,orain dun/k tenorea lelopean. Azkaineko aurkezpenean joko zein eztabaiden artean pintxoak, musika eta giro ederra izan zuten. Bertzalde, otsailaren 2an Ezpeletan ospatuko den Gazte Egunaren aurkezpena ere egin zuten. Eztabaidak, bazkaria, jokuak eta kontzertuak izanen dira: Zezenaren taldea, Betagarri eta Sutagar.