Nafarroako Gobernuko Ingurumen departamentuko oihan zerbitzuko zenbait arduradunek sasi erretzeei buruzko hitzaldia eskaini zuten abenduaren 11n. Hamasei lagun elkartu ziren Malerreka aldean eskaintzen den lehen hitzaldi honetan. Partikularrek sasiak erretzeko tramiteak nola egin izan zen gai nagusia. Internetetik edo Herriko Etxetik har daitekeen agiri bat bete behar da eta baldintzak betez gero, baimena ematen da, hori bai, bost lagun eta Oronozko suhiltzaileak bertan izatea eskatuz. Azarotik apirilera izan ohi da erretze garaia.
Baratze eta belagietan pilatutako sasiak erretzeko ez da baimen beharrik, baina kontuz ibili behar da, toki garbian erre, errepidetik urrun eta haizerik ez dabilenean. Baliteke Foruzaingoak ere denuntziaren bat jartzea, baina normalean bertan behera gelditzen da basozainek ez dela arriskurik edo utzikeriarik izan egiaztatzen badute.