‘Hamabost megalito berri Erakurri-Mendaurko estazioan (Nafarroa)’ irakurri ondotik, Txukun leitzarrarekin batera Erakurri, Ezkain, Olegi eta Latargi inguruan ibili ginen, hor dauden monumentu guziak lokalizatu eta argazkiak ateratzeko asmoarekin. Azken emaitza, dexente gehiago badaudela egiaztatu ahal izan genuen. Ez naiz ausartzen kopuru zehatza adieraztera, Sansineneak zioenez, batzuk lurrak edo belarrak estaliak egon baitaitezke.
Euskal Herriko berezienetako bat den Iruñarriko menhirraren izen eta esanahiari buruzko iritzi ezberdinak daude. Batzuen ustez, Iruñarrik Iruñeko Harria esan nahi du, Sansonek hiriburutik harritzarra bota zuela dioen kondairan oinarrituta. Beste batzuk diote Irudiarritik datorrela, hau da, eguzkiarekin edo ilargiarekin gizakiaren irudia duten itzalak egiten dituela. Zakil itxurako forma luzea izateagatik, ama izan nahi zuten emakumeak ere bertara hurbiltzen omen zirela diote beste batzuk. Landutako harria da, hori garbi dago, eta lau puntu kardinalak seinalatzen ditu, argi eta garbi.