Joan den azaroaren 24an ospatu zen Kantu Zaharren Egun arrakastatsua Dantxarineko Lugarana jatetxean. 350 lagunek giro ederrean pasatu zuten egun osoa eta Euskal telebistako kamerak ere bertan izan ziren saioa grabatzen. Gabon gauean, abenduaren 24an eskainiko dute saioa 22:00etatik aitzinera. Beraz, mahai ingurutik mugitu gabe eta familiarekin batera izanen da Kantu Zaharren Egunaz gozatzeko modua.
Mahai Inguruko kantuak II
Mahai Inguruko kantuak II diska ere plazaratu dute, 12 abestirekin. Alberto Zunzarren, Antonio Inda, Itziar Aleman, Goreti Antzizar, Jokin Irigoien, Juan Mari Aleman, Kiko Gartxitorena, Lorea Babaze, Luis Mari Retegi, Maxux Elizegi, Patxi Mariezkurrena eta Angel Mariezkurrena ari dira kantari. Musikariak, berriz, Aitor Ibarra Jalisko (tronpeta eta musika ekoizlea), Beatriz Agirre (akordeoia), Joxerra Mitxelena (baxua eta gitarra) eta Jon Irazoki (pianoa). Elbeteko estudioan grabatu dute, Mikel Biguria eta Candi Fernandez teknikariekin. 10 eurotan paratu dute salgai, baina diska bakoitzeko euro bat, krisiaren eraginez Bortziriak, Malerreka eta Baztanen beharrean daudenei bideratuko zaie, gizarte zerbitzuen bitartez.