Iparraldeko hautetsi gehienek galdetzen dute departamendu berria sortzea eta 8 eskumen gehiago izatea Lapurdi, Baxe Nafarroa eta Xiberuan. Urrats hori errepublikaren barnean gauzatu nahi lukete Frantzian egun hauetan egiten ari den dezentralizazio prozesuaren baitan. Dena den, aldaketa instituzionalak zonbait traba dauzka bidean ezkerreko gobernuko bi ministrok ezezko borobila eman baitiote eskaera demokratikoari. Dena den, hautetsiek lanean segitu nahi dutela argi gelditu zen berriki Senperen ospatu den Lema Eguna gogoetaldian. Ehun lagun hurbildu ziren EAJ-PNBk apailatu zuen gaualdia entzuterat.
Christine Bessonart auzapezaren ustez atea ez da betiko hetsi eta ez da kuraia galdu behar. Bere erranetan hobe da kudeaketa eta erabakiguneak ahal bezain hurbil izatea geroa ahal bezain ongi prestatzeko. Beñat Inchauspe Hazparneko auzapez eta kontseilari nagusiaren arabera, kirolan bezala, zailtasunak direlarik indartzen dira ideiak eta asmoak. Alderdi sozialistaren ezezkoa deitoragarria da Inchauspe zentristaren ustez eta ondoko egunetan mobilizatzen segitu beharko dela iduritzen zaio.
Azkenik, Manu Bakero legegizon eta EAJko kidearen erranetan bi ministroen ezezkoa erdi sorpresa bertzerik ez da Frantzian jakobinismoa baita nagusi eta ez baita bat batean dezentralizazio sukarra sortu eta hedatu. Oroitarazi zuen galde hunek 200 urte dituela Frantziako iraultzaren ondotik Biarnoa eta Iparraldea Pirinio Atlantikoak departamenduan bortxaz bildu zirenetik. Biltzar hunen biharamunean, Baionan Iparraldeko hautetsien kontseiluak aho batez bozkatu zuen departamendu berria sortzea eta 8 eskumen lortzea galdetzea Frantziako ezkerreko gobernuari.