Giro bikainean joan dira Aurtizko San Martin bestak. Hagitz partehartzaileak eta jendetsuak izan dira ekitaldi guziak, mus txapelketarekin hasiz eta postre eta tortilla lehiaketarekin bukatuz. Mus txapelketan 8 bikotek parte hartu zuten eta Julen-Mikel bikoteak irabazi zien finalean Oihana-Bidane ahizpei.
Ortziralean herri bazkariak hartzen du protagonismoa, baina aurretik Olasagastik aizkora apostua irabazi zion Ander Erasun-i. Herri bazkarian 65 lagun bildu ziren eta Egaña eta Lizasoren bertsoekin eta Joxe Angelen musikarekin gozatu zuten. Larunbatean, txistulariek goizeko kalejiraz gain, eguerdian ere bertze bat eskaini zuten egitarauaz kanpo, Garbiñe Leiza txistulariak, Josetxo Lekaroz akordeoilariak eta bertze musikari batzuk. Haur jokuen ondotik bazkaria egin zuten. Arratsaldean musikak segitu zuen, Mendaur trikitixa eskolak bi orduko emanaldia eskaini baitzuen. Gauean, Gozategi talde mitikoak disko berria aurkeztu zuen eta Trikidantz taldea ere aritu zen. Sekulako jendetza bildu zen, giro bero eta polita bizitu zen plazan eta herrian. Azken egunean, meza ondotik Ibintzako dantzariek saioa eskaini zuten eta arratsaldean aizkora erakustaldia izan zen. Postre eta tortilla txapelketan parte hartze handia izan zen. Tortilla txapelketa Txaro Goizuetak irabazi zuen eta postreena Ana Altzurik.