Malerrekako Mankomunitateko Euskara Zerbitzuak eta Erreka Guraso Elkarteak haurrendako literatur emanaldia antolatu dute. Katalina kontalari liburuko ipuin eta ilustrazioekin gozatzeko aukera izanen dute Doneztebeko liburutegira hurbiltzen direnek.
Bi saio izanen dira; 17:00etan haur hezkuntzako haurrei zuzendua eta 18:00etan 6 eta 9 urte bitartekoei eskainia. Iñaki Zubeldia idazleak eta Estibaliz Jalon ilustratzaileak sortutako liburuan, naturaren eta zomorroen bizitza baketsuari buruzko istorioa kontatzen da. Katalina kontalari lanean, txitxarra da protagonista. Txitxar ezin berritsuago honek, beste hiru pertsonaia aurkeztuko ditu bere kontakizunen bitartez: mantangorria, tximeleta eta azkenean matxinsalto bihurtuko den hankaluze bat. Txitxarraren kontakizunek basoko biztanleak txoratuko ditu, kultura ahoz ahoz trasmititzeko ohitura berritzen du.
Katalina kontalari lanarekin 2008ko Etxepare Saria irabazi zuten Zubeldia eta Jalonek.