Aizkorak zorrotz eta urduritasuna giroan, II.Mailako Nafarroako finala jokoan. Ortziralean jokatu zen norgehiagoka eta Ruben Saralegik jantzi zuen lehenengoz txapela. Aste baten buruan, jantzi duen bigarrena. Azaroaren 11n, Euskadiko Hirugarren Mailako garaipena ere eskuratu baitzuen 22 urteko leitzarrak. Ikusi argazkiak
Ruben Saralegirekin batera bertze lau aizkolari: Iban Resano (Dorrao), Asier Pellejero (Areso), Xabier Mindegia (Beintza-Labaien) eta Raul Kastro (Urrotz). Aizkolari bakoitzak bosna pago-enbor ebaki zituen: bi kanaerdiko, bi 60 ontzako eta oinbiko bat. Leitzarrak mendean hartu zituen bertzeak, 16:04.26 minutuko denbora eginaz. 48 segundura, Xabier Mindegia izan zen txapeldunordea. Horren ondorioz, biak ariko dira heldu den sasoian Nafarroako Maila Nagusian. Eskualdeko bertze bi ordezkariei dagokienez, Asier Pellejerok hirugarren postua eskuratu zuen eta Raul Kastrok berriz azken postuan amaitu zituen lanak, txapeldunak baino sei minutu gehiago behar izan zituen enbor guztiak mozteko.
Sailkapena
1. Ruben Saralegi (Leitza) 16:04.29
2. Xabier Mindegia (Beintza Labaien) 16:52.33
3. Asier Pellejero (Areso) 19:56.42
4. Iban Resano (Dorrao) 21:01.39
5. Raul Kastro (Urrotz) 22:19.31