Urriaren 13an besta egun ederra izan zuten Arkupeak erretiratuen Elkarteko kideek. Doneztebeko elizan meza aditu eta gero, urtero bezala, omenaldien txanda izan zen. Urrezko ezteiak ospatu dituzten senar-emateak eta 85 urte bete dituztenak zoriondu zituzten eta Bazkidearen Eguna ere egin zuten. Gero bazkaria ederra dastatu zuten eta eguna dantzaldiarekin akitu zuten. Guzira 637 lagunek parte hartu zuten ospakizunean.
Bi ekimenak egun berean egiten zen lehen aldia zen. Orain arte, Bazkidearen Eguna urte hondarrean egin izan da, eta omenaldiak ekainean. Aurten, ordea, biak batera urrian egitea erabaki zuen Arkupeak Elkarteak. Batetik, Nafarroako jubilatu elkarte aunitzen artean zabaldua dagoen ohitura hemen ere ezarri nahi dutelako egin dute aldaketa hau. Bertzetik, berriz, zuzendaritza talde berriak urtean hildako bazkideak gogoan eduki nahi zituelako.
URREZKO EZTEIAK ETA 85 URTE
50 urte ezkondurik bete dituzten senar-emazteaj hauek dira: Vicente Fagoaga eta Mª Cruz Tolosa (Bera); Migel Dagerre eta Xole Iturbide (Erratzu); Migel Hita eta Francisca Etxeberria (Igantzi); Hipolito Iparragirre eta Mª Mar Sanzberro (Igantzi); Teodoro Irigoien eta Kontxita Etxebeste (Igantzi); Jose Zurriarain eta Anunciacion Babaze (Irun); Miel Barriola eta Feli Aierdi (Leitza); Enrique Bildarraz eta Mª Cruz Zabaleta (Leitza); Eusebio Maritorena eta Isabel Uharte (Leitza); Migel Manterola eta Mª Jesus Legaz (Sunbilla). Denek bere oroigarria jaso zuten eta argazkiak atera zituzten senideekin.
Aurten 85 urte bete edo beteko dituztenak, berriz hauek izan dira: Aresoko Pilar Arraiago Hernandorena, Arizkungo Francisco Jabier Larralde Ustariz, Berako Josefa Agirre Irazoki, Pepita Barandiaran Aldasoro, Vicente Fagoaga Barberon, Pakita Iratzoki Berasain eta Migel Martinez Laskurain, Donamariako Jacinta Inda Arregi eta Leon Lasaga Irazoki, Doneztebeko Esperanza Olaizola Caminoa eta Maritxu Oskoz Sarratea, Erratzuko Migel Dagerre Larregi, Etxalarko Perpetua Arburua Iturria eta Maria Zubieta Arburua, Goizuetako Milagros Lujanbio Loiarte, Igantziko Francisca Etxeberria Telletxea, Irungo Elena Gallego Miguel, Lucia Otaegi Arrieta eta Luis Sorzabalbere Otxoteko, Iturengo Hilaria Mutuberria Martikorena eta Mikaela Etxeberria Hernandorena, Lesakako Bittori Pikabea Altzugarai eta Anastasio Ramos Rueda. Oizko Maria Zelaieta Saldias, Oronozko Sagrario Etxandi Uterga, Sunbillako Alberto Arretxea Bertiz, Urrozko Josefa Etxegia Telletxea, Zubietako Julia Uhalde Indakoetxea eta Zugarramurdiko Juan Bidegain eta Mª Jesus Gainza.
MENDI TALDEAREN URTEKO BESTA
Arkupeak elkarteko mendi taldeak ere urteko besta egin zuen urriaren 17an, Lezeta jatetxean. Aurretik, mendi ibilaldia egin zuten Otsondo inguruan, haize bortitza lagun zutela.
Arkupeak elkarteko mendi taldea joan den urtean hasi zen lanean, zuzendaritza batzordea berritu zenean, baina 15 urte baino gehiagoko historia dauka. Zehazki, 1996an Baztango Santiago Bidea egin zuen Arkupeak elkarteak, Dantxarinetik Iruñera. 14 laguneko talde batek, lehengo bidearekin segitu zuten Barrankan barna, Ziordia bitarte. Halako arrakasta izan zuenez, Iruñetik Santiagora bidearekin segitzea erabaki zuten, baina Arkupeak elkartearen barnean ezin zenez egin, mendi talde berria sortu zuten: Goiz Mendi Taldea. Lau urtetan hiru aldiz egin zuten Frantziako Bidea eta 2011n Kostako Bidea. Aragoiko Bidean ere ibili ziren. Hilabetean behin Euskal Herriko mendiren bat igotzea eta ekainean, Pirinioetara astebeteko ateraldia egitea ere erabaki zuten.
Arkupeak elkarteko junta berria osatzerakoan, elkarte barnean osatu zen mendi taldea eta hileroko ateraldiekin segitzen dute. Honela, Ibardin, Ezkurra, Leitza, Aralar, Bertiz eta Otsondo inguruan ibiliak dira eta Saioa, Txindoki, Aizkorri eta Gorbeara joateko asmoa dute.