Ttipi-Ttapa Fundazioak Nafarroako Kutxa Fundazioko Zuk Aukeratu; zuk erabaki egitasmoaren barrenean bere proiektua aurkeztu du berriz ere. 50.063 zenbakia du TTIPI-TTAPAren proiektuak eta 26.600 euro eskatzen ditu.
Orain arte, Nafarroako Kutxako bezeroa izan behar zen egitasmo hauetan laguntza emateko, baina aurtez ez. Nafarroan erroldatutako 18 urtetik goitiko guztiek parte har dezakete proiektuak aukeratzen, ez da beharrezkoa Nafarroako Kutxako edo La Caixako bezero izatea. Nafarroako Kutxa Fundazioak 10 euro bideratuko ditu aukeratzen den proiekturako, baina garbi izan behar da diru hori ez duela norberak bere sakeletik eman beharko, Fundazioak berak bere funtsetatik baizik. Internetez ere egiten ahal da www.cajanavarra.com webgunean sartuta edo, TTIPI-TTAPArena aukeratzen baduzu, Lesakako bulegoan lagunduko dizugu eskaera egiten. 2013ko martxoaren 30a bitarteko epea dago proiektua aukeratzeko.
TTIPI-TTAPAren proiektuaz gain, gure inguruko bertze zenbait erakundek aurkeztu dute bere proiektua, hala nola Xorroxin Irratiak, Xaloa Telebistak, Erreka edo Arkupeak elkarteak, etabar…