Baztan, Malerreka eta Bortzirietako 16 jatetxek parte hartuko dute aurten hogeigarren aldiz eginen diren ehizari buruzko jardunaldi gastronomikoetan. Informazio orrietan nahiz kartetan agertuko den irudiaren egilea, berriz, Tomas Sobrino margolari baztandarra da.
Bertizko Partzuergo Turistikoak antolatzen dituen jardueren artean, ohikoa bihurtu den ekimena urriaren 26tik abenduaren 2ra eskainiko da.
Hauek izanen dira ehizari lotutako menu bereziak eskainiko dituzten 16 jatetxeak (iaz baino 3 gehiago): Almandozko Beola, Arantzako Burlada eta Aterpe, Berako Euskalduna, Zalain eta Zubiondo, Donamariako Benta, Doneztebeko Ameztia, Elbeteko Posada eta Oñaska Berri, Etxalarko Herriko Ostatua eta Benta, Igantziko La Villa, Iruritako Olari, Lesakako Koxkonta eta Oizko Posada.
Partzuergoak menu guztiak biltzen dituen folletoa argitaratu du, jatetxeetan eta informazio turistiko puntuetan eskuragarri egonen dena, baita www.consorciobertiz.org webgunean.