Egun handirako egitarau zabala prestatua zuen Elgorriagako Onddo eta Zizen kofradiak. Goizean, urteroko legez, Santiago parrokian, hildako bazkide eta laguntzaileen omenez meza izan zuten. Arangurengo abesbatzak kantatu zuen meza. Segidan, Jose Miguel Galarregi, Elgorriagako Onddo eta Zizen Kofradiako presidenteak ohorezko hiru kide berrien merituak aipatu zituen. Aurtengo kofrade berriak hauek dira: Jose Javier Esparza, Nafarroako Gobernuko ingurugiroko kontseilaria, Alberto Rios, Embutidos Burgos enpresako jabea eta Jose Luis Cepeda, Cruzcampo erakundeko kidea. Bestan ez zituzten ahantzi hildako kofradeak eta omenaldia eskaini zieten, haien artean Juanito Mariezkurrena, Salvador Arotzena eta Elisa Marin omendu zituzten.
Goizeko 11:30etarako hasia zen Salvador Arozarenaren omenez antolatzen den kaxula lehiaketa. Lehiaketa honetan, lehengo eta oraingo kofradeek parte hartzen dute, baita bertze kofradietako kideek ere. Onddo beltza izaten da protagonista nagusia, baina berekin batera, bertze kofradiek ordezkatzen duten produktuak ere sartzen dituzte kaxuletan. Hamar taldek hartu zuten parte eta Nafarroako Zainzuriaren kofradiakoak eta Bidasoako Izokinaren kofradiak izan ziren irabazleak. Lehiaketa eta gero, nahi zuenak kaxulak dastatzeko aukera izan zuen. Zubietako joaldunek ere, giroa berotzen lagundu zuten beraien joare soinuekin eta Migeltxo Saralegik harrijasotze erakustaldia eskaini zuen plazan eta lau urteko semea izan zuen lagun. Segidan, txistorra, urdaiazpiko, odolki, gazta, sagardo eta ardo dastaketa egin ziren frontoian.