Joan den urtean ez zuen parte hartzerik izan lesio baten ondorioz, baina aurten berriz ere Nafarroako txapel nagusia jantzi du Floren Nazabal aizkolariak. Herrian, Etxarri-Aranatzen jokatu zen finala urriaren 7an eta aisa nagusitu zen.
Floren Nazabalek 30 minutu eta 39 segundu behar izan zituen lau kanaerdiko, bi oinbiko eta 60 ontzako lau enbor mozteko eta 5 minutu eta 19 segunduko aldea atera zion bigarren izan zen Jon Rekondo leitzarrari (35:58). Hirugarren Ander Erasun aurtiztarra izan zen (36:36) eta laugarren Antonio Senosiain (39:39). Donato Larretxeak proba utzi behar izan zuen bigarren oinbikoa moztu ondotik, gerriko minaren ondorioz.