Transportes Bidasoa-Inurrieta master mailako taldeko txirrindulariek bi txapel eta brontzezko domina bat lortu dituzte Euskal Herriko Txapelketan; Luziano Mitxelena lesakarra txapeldun izan da master 60 mailan, Ion Zeberio elizondarra senior mailan eta Iñaki Villoria Iruritarra 3. master 40 mailan. Aipagarria da AEL taldeko Patxi Meoki elizondarrak master 50 mailan lortutako txapela.
Transportes Bidasoa-Inurrieta taldea sei txirrindularirekin aurkeztu zen txapelketara. 91 kilometro zituen frogak, baina lasterketa erdian zegoen master 60 mailako helmuga. Maila horretako garaipenaren lehian, Mikel Arburua igantziarra, Ibon Urtiaga betelutarra, Joxe Angel Mitxelena lesakarra eta Iñaki Villoria iruritarra Luziano Mitxelenaren mesedetan aritu ziren; Luzianok aisa irabazi zuen.
Bigarren erdian bi igoera zeuden eta taldeak Iñaki Villoria eta Ion Zeberioren aukerak jokatu nahi izan zituen. Baina ihesaldian ibili arren, Zeberio eta Meoki taldetxo batean helmugaratu ziren. Zeberio lasterketan hirugarren izan zen, senior mailan txapela lortuz, Meoki 6. helmugaratu zen master 50 mailan irabaziz. Hurrengo tropelean ailegatu zen Villoria, master 40 mailan 3. postua lortuz. Gertu helmugaratu zen Joxe Mari Goia igantziarra, berriki Euskal Herriko BTT maratoia irabazi duena eta Elgorriagako Manolo Ganboa aurtengo La Indurain probako garailea; Ibon Urtiaga atzerago helmugaratu zen, eta Joxe Angel Mitxelena eta Mikel Arburuak ez zuten proba bukatu.