Bertze urte batez, Joaldunen Eguna antolatu dute Iturenen eta larunbat honetan izanen da. Goizean goizetik joare soinuak nagusituko dira herrian barna. Goizean plazan bilduko dira joaldunak eta trikitilari eta panderojoleen laguntzarekin Ameztia auzorako bidea hartuko dute. Auzoko baserrietan ibili ondotik Lasaga auzora jeitsiko dira eta ondotik herrira.
Behin plazara inguratuta, Jexux Mari Irazu eta Aitzol Barandiaranek bertso batzuk botako dituzte eta aizkora apusturik ere ez da faltako. Floren Nazabal eta Donato Larretxeak aizkora saioa eskainiko dute.
Bazkaria plazan eginen da eta bazkalondotik aitzinera, Joxeanjel akordeoilariarekin dantza batzuk egiteko aukera izanen da.