Arkupeak jubilatuen elkarteko bazkide eta bazkide ez direnentzat hainbat ikastaro eta hitzaldi prestatu ditu zuzendaritzak: artearen historian sarrera, matematika kalkulu orriarekin, frantsesa (hasiera edo jarraipena), jubilatu eta zaintzaleen inguruan, tokian tokiko historiaren tailerra eta 2012 Zahartze Aktibo eta Belaunaldi arteko Elkartasunaren Urte Europarraz ere bai. Ikastaro horiek paratu ditu oraingoz martxan eta interesatuek aste honetan matrikulatu beharko dute, irailaren 21a baino lehen, 948 450878ra deituz 09:30etik 12:30era.
Behin matrikula egiteko epea bukatuta, irailaren 24an interesatu guztiekin bilera eginen da Arkupeak-en egoitzan, 17:00etan. Zuzendaritzak ikastaroak Donezteben ematea aurreikusia du baina bertze herrietan ere guttieneko kopurua apuntatuz gero, Beran eta Elizondon izan daitezke klaseak.
Bertzelako ikastaroak ere izanen dira: frantsesa, olio-pinturarako sarrera, informatikako hastapena eta sakontzea... Kasu hauetan, urriaren 1etik 5era eman beharko da izena eta nahi duten guztiek parte har dezakete.
Hitzaldi batzuk ere antolatu dituzte: Bizi testamentua, heriotza duina eta borondatezko aurrerapenak solasaldia azaroaren 15ean Donezteben eta azaroaren 22an Leitzan eskainiko dira. Jubilazioa eta pentsioen eta testamentuen inguruan ere hitzaldia antolatzeko asmoa dute, nahiz eta oraindik ez duten zehaztu noiz.