Nafarroako mendialdea tokiko telebistendako lizentzia aukerarik gabe utzi du berriz Gobernuak

Abuztuaren 20ko Nafarroako Aldizkari Ofizialean argitaratu ziren tele­bista digitalen lizentziak esleitzeko bi deialdi. Lehenbizikoaren arabera, 20 tokiko telebista berri­rendako lizentziak esleitu­ nahi dira, bosna hiri-eremu bakoitzean. Lizarra ingururako 5 lizen­tzia, Iruñerrirako 5, Zangozalderako 5, Tafalla in­guru­ra­ko 5 eta Tutera alderako 5. Toki­ko telebisten ikus-eremua tokikoa izanda, eremu horietatik kanpo ez lirateke ikusiko.

 

Bigarren deialdian, bertze bi telebistendako lizentziak banatuko dira baina, kasu honetan, telebista berrien ikus-eremua Nafarroa osokoa iza­nen da. Telebista kate be­rriek berriki emiti­tzeari utzi­ dioten Canal 4 eta Popular TVk utzitako lekua hartuko dute.

 

2006an antzeko prozedura bete zuen Nafa­rroako Gobernuak. Bai orduan eta bai orain, ez du tokiko tele­bistendako lizentzia aukerarik aurreikusi Vas­cuencearen Legeak eremu euskaldunean sar­tzen dituen udale­rrien­­tzat. Horrela, Nafa­rroako Parlamentuak 2006an hartutako akordioei kasurik egin gabe, Foru Gobernuak berriz atea itxi die TTIPI-TTAPA Telebistak edo Xaloa Telebistak azkeneko hamarkadetan hainbat aldiz egin­dako eskaerei.

 

Nafarroa osorako bi kanalez gain, tokian toki­koetan 20 lizen­tzia esleitu nahi ditu Gobernuak. Gehiegizko lizentzia kopurua da, tajuz­ko programazio bat eginez ekonomikoki bideragarriak izateko hain­bat es­kualde­tan, Zangotzaldeak 9.000 biz­tanle baino ez baititu, Tafallak 12.000…

 

Gara egunkarian argi­taratutakoaren arabera, ETBko zerbitzu juridikoak aztertzen ari dira deial­di honetara aurkezteko aukerarik duten ala ez. In­formazio horrek dioenez, joan den martxoan­ elkartu ziren Alberto­ Surio EITBko zuzendari nagusia eta Juan Luis Sánchez Muniain kontseilaria gai honetaz hitz egite­ko. Aurkeztea erabakiko balu eta deialdiaren eska­kizunak kontuan hartuta, ETB behartua egonen li­tzateke Nafa­rroari buruz­ko programazio espezifi­koa ekoiztera Nafarroan.

 

Euskararen Gizarte Era­kundeen Kontseiluak be­re aldetik, «kezka handiz» hartu du Gobernuaren deialdia: «ez du euskara hutsezko lizen­tziarik gorde, eta programazioan euskara erabil­tzea­gatik esleituko duen­ puntuazioa hutsaren hurrengoa da». Deialdia Nafa­rroako Gobernuak euska­razko hedabideen aurka daraman politikaren segi­da dela salatu du.