Natur bideen Europako Eguna dela aprobetxatuz, bi ekimen prestatu ditu Plazaola Partzuergo Turistikoak igande honetarako, irailaren 16rako: IX. Mendi Bizikleta Martxa alde batetik, eta VI. Maratoi Erdia bertzetik.
Maratoi Erdia aukeratzen dutenek Gipuzkoa eta Nafarroaren arteko mugatik, Urtotik Lekunberrirako bidea egin beharko dute, 21 kilometro. 09:30ean aterako dira. Izen-ematea lasterketa baino lehen egin behar zen eta osteguna zen azken eguna.
Mendi Bizikleta Martxa nahiago dutenek hiru ibilbide izanen dituzte aukeran: 40 kilometrokoa (Andoain-Lekunberri), 15 kilometrokoa (Leitza-Lekunberri) eta haurrentzat 4 kilometrokoa (Lekunberri-Mugiro-Lekunberri). Kasu hauetan aitzinetik edo egun berean eman daiteke izena.
Ibilbide luzea aukeratzen dutenek izena aitzinetik ematen badute 13 euro ordaindu beharko dituzte eta egun berean 18 euro; hamabortz kilometrokoa aukeratuz gero, aitzinetik 9 euro eta egunean bertan 12 euro; lau kilometroko bidea aukeratzen duenak aitzinetik 2 euro eta egun berean 3 euro ordaindu beharko ditu.