Donato Larretxeak eta Unai Otañok irabazi zuten abuztuaren 12an Ramon Latasaren omenez Sunbillan jokatu zen aizkora saria. Gazteen mailakoan, berriz, Jon Rekondo leitzarrak eta Ander Erasun aurtiztarrak lortu zuten txapela. 500 ikusle baino gehiago bildu ziren frontoian saioa ikusteko.
Maila nagusian, hiru bikote aritu ziren, eta bakoitzak lau lan ezberdin egin behar izan zituen. Nazabal eta Arrospide indartsu hasi ziren, eta azkeneko probara ere hiru segundo aitzinetik iritsi ziren. Iraupen proban, ordea, Otaño eta Larretxea aunitzez ere gehiago izan ziren eta alde nabarmena kendu zieten gainerakoei (39:52). Nazabal eta Arrospide bigarren izan ziren (40:58). Aitzol Atutxa eta Juanjo Lopez, berriz, hasierako probatik gelditu ziren gibelean, eta kasik 6 minutu gehiago behar izan zuten (45:40).
GAZTEETAN REKONDO ETA ERASUN
Helduen mailaz gain, gazteena ere erakargarria zen, eta hor Jon Rekondo leitzarra eta Ander Erasun aurtiztarra gailendu ziren (31:24). Maila honetan bikote bakoitzak hiru proba ezberdin egin behar izan zituen. Txapeldunak hasieratik paratu ziren aitzinetik, baina ez zen alde handirik egon. Emoziorik handiena bigarren posturako egon zen. Mugertza II.ak eta Oihan Larretxeak lortu zuten postu hori (32:36), baina Otaegi eta Olano I.a ere gainean izan zituzten (32:54). Azkeneko bi bikoteen artean 18 segundoko tartea bertzerik ez zen izan bukaeran.