Sarako Kontrabandisten lasterketa seigarren aldiz irabazita, marka berria egin du Fernando Etxegarai beratarrak. Orain arte, Sarako Ramuntxo Lamothe eta Etxegarai pare-parean zebiltzan bakoitza bosna txapelekin. Erdietsi berri duen markari esker, Etxegarairen esku dago orain errekor berria.
Denborei begiratuz, ordea, aurten ez zen markarik hobetu; konparaziora, 2006an, Etxegaraik berak 38 minutu eta 36 segundotan egin zuen proba. Eta aurten, 39:11 behar izan zuen itzulia osatzeko, bigarren postua eskuratu zuen Ezpeletako Benoit Corik baino lau minutu guttiago. Lehenbiziko emakumea, berriz, Lurdes Oiartzabal lezoarra izan zen (55:24), sailkapen orokorrean 22. postuan.
Gainerakoan, 33 lasterkarik parte hartu zuten proban, 18 herri ordezkatuz. Sarako lasterketa hau egiten hasi zirenetik, antolatzaileek errekaren bi aldeetako lasterkariak gonbidatzen dituzte parte hartzera deus ordaindu gabe, gehienez ere bi lasterkari herri bakoitzeko. Arrazoi horrexegatik gonbidatutako herri bateko inork ez badu izenik ematen eta gonbidatua den bertze herri batetik bi lasterkari baino gehiago baldin badaude, azken hauek ordezkaririk ez duen herriaren izenean parte hartu ohi dute. Aurten ere, Bera, Sara, Zugarramurdi, Senpere, Lesaka, Etxalar, Urdazubi eta Elizondoko herrien izenean aunitzek parte hartu dute, batzuk eskualdekoak, baina ez denak.