Jondoni Petrikari Senpereko otoitz leku nagusia fededunei itzulia izan zaie uda honetan aitzineko lau hilabetetan hetsia egon baita lanak egiteko. Lehenik argiztapena eta galerien segurtasuna hobetu behar zen, baina Herriko Etxeak eta parropiak lan gehiago egin nahi izan dute. Lan horiek beharrezkoak ziren zurezko galeria batzuen segurtasuna hobetzeko eta argiztapen orokorra osoki berritzeko. Orotarat 65 000 euro baliatu dira lan horiek oro egiteko eta parterik haundiena herriak ordaindu du otoitz lekuaren jabea baita.
Bertzalde, Daniel Petriat herritar zenaren nahia bete da lan hauekin. Berriki zendu den fededun ezagunak eliza, horren historia eta oro har erlijio katolikoa ezagutarazi nahi zituen molde berriekin. Bere ametsa bete da euro baten truke elizaren bisita gidatua egiten ahal baita orain euskaraz, frantsesez edo gaztelaniaz. Bisita hauetan bilduko den dirua parropiari ematea deliberatu du Herriko Etxeak.