Eskubaloiko aurredenboraldia hasi du Erreka Kirol Elkarteak. Seniorretan Patxiku eta Felipe Ganboa anaiek segituko dute entrenatzaile lanean eta joan den urteko denboraldi bikaina berdintzen saiatzea izanen dute aurtengo erronka, nahiz eta Iban Ezkurra eta Luismi Apezetxeak, biek ere lesioengatik, taldea utzi behar izan duten. Bertzalde, bigarren urtez, Mariezkurrena Eraikuntzak enpresa izanen da talde seniorraren babesle nagusia.
Hala ere, aurtengo berrikuntza nagusia jubenil mailan ere taldea izanen dela da. Iban eta Txomin Mindegia izanen dira entrenatzaile eta joan den urteean kadeteetan aritu ziren jokalariek osatuko dute taldea. Aipatu, joan den urtean Nafarroa mailan hirugarren postuan akitu zutela.
Asobaleko partidak
Erreka Kirol Elkarteko bazkideek Asobal ligan partidak ikusteko aukera ederra izanen dute. Izan ere, Anaitasuna eta Errekak duela hilabete pare bat sinatutako hitzarmenari esker, Errekako bazkideek %50eko deskontua izanen dute abonoa erosterakoan. Gainera, Errekako taldeetan aritzen diren benjamin, alebin eta infantilek debalde jasoko dute denboraldi osoko abonoa.