Joan den urteko arrakasta ikusita, aurten ere Euskal Herriko zazpi herrialdeak errugbiaren bidez elkartzeko erronka luzatu du Sarako Izarra errugbi taldeak. Hala, larunbat honetan, Euskal Herriko Errugbi Txapelketaren bigarren edizioa jokatuko da Sarako Animainiako zelaian. Zortzi ekipa ariko dira lehian: Sara, Ziburu, Hernani, Baztan, Getxo, Maule eta Ustaritzeko taldeak, hain zuzen.
10:00etan hasita, egun osoan errugbi partidak jokatuko dira eta ilunabarrean, Madricale musika taldea ariko da plazan. 21:30ean otordu animatua eginen da Kuxkuxtu txarangarekin eta ondotik dantzaldia izanen da Zelata taldearekin. Otorduetan parte hartzeko aitzinetik egin behar da erreserba, Sarako Plekako ostatuan, Herriko Etxeko Edantegian edo Keinu ostatuan.
Joan den urteko arrakasta
Iaz antolatu zuten lehenbiziko aldiz Euskal Herri mailako Errugbi Txapelketa eta orduan Nafarroa Behereko St-Palais taldea nagusitu zen. Antolatzaileek balorazio ona egin zuten. Zikiro jatean 500 lagun elkartu ziren eta horrekin 5.000 euro bildu ziren Integrazio Batzordearentzako. Aurten ere, irabaziak aipatu erakundera bideratzko asmoa dute. Lehengo urtekoarekin alderatuz, aurtengoak duen desberdintasuna, arratsaldeko bestak plazan segituko duela izanen da.