Aste pare baten buruan, hementxe izanen ditugu Santiburtzioak. Egunez egun, egitarauaren berri izateko aldizkari honetako gehigarrian irakurtzeko aukera izanen duzue. Hemen, berriz, bestak heldu diren honetan ohar batzuk emanen ditugu.
Alde batetik, Baztan Zopetako afarirako bazkideentzako txartelak Ulibeltzak Elkartean egonen dira salgai hilaren 28an, 19:30etik 20:30era. Gainontzekoentzat uztailaren 29tik aitzinera salduko dira ostatuetan, eta hondarreko eguna abuztuaren 7a izanen da. Erran, afariko menua hau izanen dela: zopak, zuri ta beltxak, gisatua, postrea, txanpaina, kafea, kopa, puroa eta edariak. 20 euro balio du.
Herriko afarirako txartelak ere uztailaren 29tik aitzinera paratuko dira salgai ostatuetan eta abuztuaren 8ra arteko epea izanen da erosteko. 29 euroren truke, hau izanen da menua: urdaiazpikoa, foie, kroketak, bildots errea patatekin, profiterolak, izozkia eta txokolate saltsa, edariak, kafea, txanpaina eta kopa.
Peñen bazkarirako txartelak uztailaren 27tik abuztuaren 5era salduko dira ostatuetan. Adin guztietako jendea apunta daiteke, eta ea animatzen den jendea.
Bertzetik, uztailaren 27an Itturburu ostatuan bilera bat eginen da txoznari buruz solasteko. Ahal duten guztiei joateko deia egin zaie.
Berrikuntzak
Bertze urteetako egitarauari begiratuta, aurten ere badira berrikuntzak. Bezperan, J. I. Muruak bordei buruzko erakustaldia eskainiko du Ariztigain kanpinean. Ondotik, herri kirol desafioa izanen da. Aurtengoan, gizon probako zortzi lagunek Errenteriako Patxi Ilarretaren idiaren aurka neurtuko dituzte indarrak. 700 kiloko harriarekin, 15 minutuko saioan zeinek plaza gehiago egin izanen da desafioa. Zetreria ere izanen da plazan.
Gainerakoan, besta ederrak heldu zaizkigu eta animatu!