1998an debutatu zuen 18 urteko gazteak bere hamargarren txapela jantzi du 32 urterekin. Aimar Olaizola goizuetarrak historia egiten segitzen du eta Buruz Buruko txapela hirugarren aldiz irabazi zuen ekainaren 24an BIlboko frontoian. Faborito argirik gabeko finala zen, teorian, Olaizola II.a eta Juan Martinez de Irujo iberoarraren arteko Buruz Buruko Txapelketakoa, baina partida, azkenean, ez zen lehiatua izan, Olaizolak erraz jantzi baitzuen txapela, 22-7 irabazita.
Irujok hasieran baino ez zion egin aurre Aimarri; goizuetarrak lehenbiziko lau tantoak egin bazituen ere, 5-7 jarri zen irabazten Iberokoa. Handik aritzinera erabat nagusitu zen Olaizola. Partida bikaina jokatu zuen goizuetarrak, ezker pareta bilatuz eta joko azkarra eginez. Nabarmentzekoa, gainera, lesioak izan dituela tartean eta ederki errekuperatu dela. Belaunean lesio larria izan zuen duela bi urte eta besoko minez ere ibili da txapelketa honetan.
Buruz Buruko hirugarren hau bere hamargarren txapel du: banaka hiru (2005, 2007 eta 2012), binaka bertze bi (2008 eta 2011) eta lau t’erdian bortz (2002, 2004, 2005, 2008 eta 2011) irabaziak baititu.