Iparraldeko Joko Torneoaren hirugarren eta azken jardunaldia jokatu zen Burgin uztailaren 1ean, aitzinetik Iruñean eta Uharten egin ondotik.
Txokor biltzen, hiru jardunaldi jokatu dira, baina puntuatzerakoan, bi denborarik onenak hartu dira kontuan. Horren arabera, Fernando Etxegarai beratarrak irabazi du, Patxi Iratzoki igantziarra bigarren izan da eta Iñaki Telletxea elizondarra hirugarren. Eskualdeko gainerakoen artean, Andoni Lasaga etxalartarra seigarren izan da. Lehen bortz sailkatuak uztailaren 28an Elizondon jokatuko den Nafarroako Txokor Biltze Txapelketan ariko dira.
Harri-jasotzen, lehen bi jardunaldietako altxaldiak hartu dira kontuan, eta Josetxo Urrutia leitzarrak irabazi du. Xabier Ariztegi etxalartarra izan da bigarren.
Lasto altxatzen, igantziarren arteko lehia izan da. Hiru jardunaldi jokatu dira liga sistema erabiliz eta Karlos Sein nagusitu da. Arkaitz Retegi eta Eneko Telletxea sailkatu diren bere ondotik, hurrenez hurren.
Txingekin hiru jardunaldi jokatu dira baina puntuatzerakoan bi markarik onenak hartu dira kontuan. Eskualdeko ordezkari bakarra Josetxo Urrutia izan da eta honek Burgiko jardunaldian behintzat ez zuen parte hartu. Sailkapenean laugarren izan da leitzarra.
Zaku lasterketan ez da eskualdekorik izan eta ingude altxatze txapelketa ez da egin, kirolari faltagatik.