Ez ohiko biltzarra egin zen Herriko Etxearen aitzinean joan den uztailaren 4an. 40 lagun bildu ziren Binta Keita 42 urteko emakumearen hilketa salatzeko. Egun batzuk lehenago jendarmeek hila atzeman zuten bere etxean, Urguri auzoan. Ondoan, 85 urteko senarra ere hila zen. Jendarmeen eta justizia saileko arduradunen arabera, senarrak bere emaztea tiroz hil zuen lehenik eta gero bere buruaz bertze egin zuen arma berarekin. Badira bi hilabete ezkondu zirela, baina beren lagunek diote haserre aldiak zituztela maiz. Iduriz, hiru haurren ama zenak etxetik joan nahi izan zuen eta orduan gertatu zen hilketa. Bikotea Bordelekoa eta Senegalekoa zen jatorriz. Senarrak etxea erosi zuen duela zonbait urte Urguri auzoan eta badira zonbait hilabete emakumea ere hor bizi zela. Biak ezagutzen zituztenen artean harridura eta samina ageri zen joan diren egunetan.
Talde feministek salatu dute azken sei urteetan hamabi emakume hil direla senarren edo bikotekide ohien eskutik Ipar Euskal Herrian. Talde hauen ustez, «hiltzaileek emazte horiek ukatu eta hil zituzten emazteen biziaren jabe zirelakoan». Sylviane Alaux eta Colette Capdevielle Lapurdiko bi diputatu berriei galdetu diete genero indarkeriaren kontrako lege bat proposatzea eta bozkatzea Parisko Asanblada Nazionalean.
DATUA:
12
EMAKUME HIL
dira azken sei urte hauetan Ipar Euskal Herrian senar edo bikotekide ohien eskutik