Birziklapenaren inguruko sentsibilizazio kanpaina egiten ari da Mendialdea Mankomunitatea Arano, Areso, Goizueta eta Leitzan, hondakinak ongi bereizteak duen garrantzia erakusteko. Langabezian dauden bi lagun kontratatu dira eta uztailaren 6az geroztik, etxez-etxe dabiltza zaborren bereizketaren azalpenak emanez eta galderak eginez: 09:30etik 13:30era eta 15:00etatik 18:00etara. Gaikako bilketa hasi zenetik urteak pasatu badira ere, 2010era arte ez zen osatu, enbaseen edukiontzia orduan paratu baitzen. Tarte honetan, Mankomunitateak balantze ona egin du, «urte batean enbaseen bilketa bikoiztu dela» esanez. 2010ean 54,55 tona bildu ziren eta iaz 101,44. «Honek 200 tona CO2 isurtzea galerazi du».