Elorri adarrak daude ateetan, etxeak zaintzen, San Joan egunaz geroztik. Batzuek, beharbada, erramua ere paratzen izanen dute, oraindik.
Pesta aurrean, belarrak egiten aritu zen jendea, abaila, aro ona tokatu baitzen. Eta akitu ere belarrari buelta ematen akitu du, astelehenarekin, herri bazkarira joan ez zenak. Banka herrian, berriz, belar guziak eginak, nonbait, hamar lagun etorri baitziren handik honaino bazkaltzera; hamar bankar, eta ez hamar frantses, askok ohitura duten bezala, Izpegiko lepoa pasatu eta bertan baitago Banka, Baigorritik 8 kilometrora, Leon Etxekoloneari galdetu bestela. Kantu politak eman zituzten, bazkalondoan, trikitilariek lagunduta, eta asko bizitu zuten giroa.
Igandean, lan handiak egin zituzten aizkolariek, eta berotu ederra hartuta, Erasunek irabazi zion, hondarreko tronkoan, Larretxeari. Arratsaldean, pilotan ziren ari beharrak, binaka eta lau t'erdian. Binaka, Lopetxenekoak eta Mariezkurrenak irabazi zuten, eta lau t'erdian, Bendoiro eratsundarrak.
San Joan bezperan ere, buruz buru aritu ziren, aizkoran; Saralegik irabazi Kañamaresi. Musean, Arretxeko aita-semeak gelditu ziren beste guzien gainetik. Horietaz gainera, haurren jokoak egin zituzten larunbatean. Bi edo hiru urte dira zenbait ama berriz hasi zirela haurren jokoak prestatzen, eta a ze fantasia ibiltzen duten haurrek! Arratsean, Triki Hots lasartearrak etorri ziren jotzera.
Ortziralean hasi ziren pestak. Lehenik, pala txapelketako finala izandu zen; anaien arteko partida, eta atzenean, Juanenea anaientzat pernilak. Ondotik, zopak jatea, eta dantzaldia Modestorekin.