Oraindik hilabete gelditzen bada ere, Amabirjin fiestetako programa lantzen ari da Udaleko Festa Batzordea eta dagoeneko bilera batzuk eginak ditu. Aurreko urteetan bezala, abuztuaren 14tik 18ra izanen dira eta etorriko diren musika taldeen artean, Trikidantz, Astiazaran anaiak, Bixente akordeoilaria, Aierrik herriko taldea eta Gabenara leitzarrak daude. Horiek baieztatuak dira.
Orokorrean, aurreko urteetakoaren berdintsua izanen da egitaraua, baina beharbada berrikuntzen bat edo beste ere izanen da. Aurrerago argituko ditugu xehetasunak. Aurrekontua ere iazkoaren beretsua izanen da. 9.000 euroren azpitik ibili ohi da fiesten aurrekontua eta musika taldeek sortzen dute gastu haundiena. Dena den, aurtengo aurrekontua oraindik ez da zehaztua.