Eusko Label Banakako Aizkora Txapelketako aurtengo irabazleak erabaki dira. Finalak ekainaren 10ean jokatu ziren Azpeitian eta eskualdetik bi ordezkari izan ziren: 23 urtez azpikoetan Ander Erasun aurtiztarra eta gazteen mailan edo 19 urtez beheitikoetan Eneko Saralegi leitzarra. Lan txukuna egin zuten batek zein bertzeak, eta azkenean, azpitxapeldun gelditu ziren bakoitza bere kategorian.
23 urtez azpikoetan, Mikel Larrañaga (Azpeitia, Gipuzkoa) eta Jon Rodriguez II.a (Segovia, Espainia) izan zituen aurkari Ander Erasunek. Azpeitiarra proba guz-tietan aitzinetik izan zuen aurtiztarrak eta txapela etxean gelditu zen. Larrañagak 22 minutu eta 45 segundoko denbora egin zuen eta Erasunek 27:58koa. Rodriguez II.a hirugarren sailkatu zen, 30:38ko denborarekin.
Gazteen mailan, Eneko Otaño (Beizama, Gipuzkoa) eta Iker Vicente (Otsagabia, Nafarroa) izan ziren Eneko Saralegiren aurkariak. Gipuzkoarra nagusitu zen proba guztietan, baina ez Saralegiri hainbertzeko tartea aterata. Azkenean, 10 minutu eta 44 segundoz egin zituen lanak Otañok eta 11:01ean leitzarrak. Otsagabikoak 12:08ko denbora behar izan zuen bukatzeko.
Urrezko Mailan, Floren Nazabal (Etxarri-Aranatz, Nafarroa) nagusitu zen, Aitzol Atutxa (Dima, Bizkaia) bigarren izan zen eta Unai Otaño (Ibarra, Gipuzkoa) hirugarren.