Arkupeak Jubilatuen Elkartean ez daude geldirik egoteko. Maiatzean ia bi astez Benidormen izan ziren 43 bazkide eta irailaren 27tik urriaren 9ra Benidormera bertze ateraldi bat egitekotan dira. Horrez gain, ekainaren 20an Bilbora joatekoak ziren eta uztailaren 9tik 17ra Puente Viesgora joanen dira.
Uztailaren 16tik 20ra, berriz, Aragoiko Pirinioetara joateko asmoa dute, eta han hainbat mendi ibilaldi egitea aurreikusia dute. Uztailaren 26an Aralarko santutegira joanen dira Atautxien Eguna ospatzera. Aurten, gainera, berrikuntza batekin antolatu dute irteera. Lehenbizi, Leitzako Peru-Harri museoa eta Mendukiloko kobazuloa ikustera joanen baitira.
Abuztuaren 31n Arantzazura joanen dira eta irailaren 10tik 16ra, Paris aldera joateko asmoa dute Arkupeak-eko lagunek. Uztailaren 9tik 11ra, 948 450878ra deituz eman beharko da izena.
Irailaren 14an Lezo bisitatuko dute, eta erran bezala, Benidorm ere bai.
Irteera hauen guztien berri Arkupeak-ek argitaratu duen laugarren boletin informatiboan ageri da. Horiez gain, informazio osagarria ere ageri da: hala nola, idazkari berria Jose Luis Legarra izendatu dutela, Elgorriagako bainuetxearekin egindako akordioa nola den edo 2012ko lehen lauhilekoan egindako jardueren laburpena ere bai. Mendiko irteerekin aitzinera segitzen dutela ere ageri da boletinean, eta dirulaguntzen berri ere bai. Gaur egun Arkupeak-ek 14.962,68 euro hartu ditu, 5.350,83 euro kudeaketarako kontratatua dagoen pertsonarendako eta 9.611,85 euro elkartearen funtzionamendurako. Oraingoz ez dakite Nafarroako Gobernuak zenbat emanen duen ekintzak eta bidaiak egiteko, ezta zuk aukeratu, zuk erabaki kanpainak segituko duen ala ez.
Bazkidearen Eguna eta omenaldiak batera egiteaz ere ari dira boletinean. Zuzendaritzaren nahia bi bestak batu eta urrian ospatzea da. Eta omenaldiak ongi prestatzeko, aurten 85 urte bete dituztenei edo ezkonduta 50-60 urte egin dituztenei dei egin diete idazkaritzan utz dezaten euren bizitzaren laburpena eta argazki bat ekainaren 30a baino lehen.
Abuztuan kaleratuko dute hurrengo boletina.