Giro polita izan zen ekainaren 16an lehenbiziko aldiz ospatu zen Artisau Egunean. Eguraldi dotoreaz, goizez, hamabortz bat artisauren lana eta ekoizpenak ikusi eta dastatzeko aukera izan zen. Eguerdi alderako plaza eta frontoi zaharra bete antzera zirela, Gorramendi gaztandegikoek bertan sua eginda, gazta bildu zuten; bi herritarrek aizturrez ardi banari ilea moztu zioten eta Malerreka Kantuz-eko taldeak ere bere saioa egin zuen, Mikel Gartzia zena gogoan. Eta nola ez, Bittoriano Arzuagari omenaldia ere egin zitzaion, bertan zaudenen esker ona hartuz, erran baitaiteke han zauden aunitz beregatik agertu zirela. Seguraski, horregatik izanen ziren bazkarian 120 lagun baino gehiago. Bertsolariek ere saio polita egin zuten, jendea gozaraziz hainbat ateraldi irrigarrirekin. Gero, dantza eta soinua ez ziren gelditu ia argitu arte. Erran bezala, giro ona ez baitzen faltatu, alde egiteko ez zen prisa haundirik izan.
Azkenean, jendea kontent gelditu zen, baita antolatzaileak ere, hurrengo urtean erronkari eusteko prest.