Ederki atera ziren Bestaberri Egunerako prestatutako ekitaldiak. Alde batetik, joan den urtean zenbait herritarrek berreskuratu zuten prozesioa egin zen, eta bestetik, Udalak antolatuta, gazta lehiaketa. Erantzun ona izan zuen, bederatzi gazta aurkeztu baitziren: Olasenekoborda, Idiartekoborda, Elamenekoborda, Serokoborda, Azkuntzolotakoborda, Parazelaietakoborda, Seroinea, Elizgain eta Martuzenea. Denen maila ona izan zen, baina azkenean, Parazelaietakobordara joan zen lehenbiziko saria eta bigarrena Azkuntzolotakobordara. Eta sari berezia eman zitzaien Olasenekobordakoei gazta berezia egiteagatik.
Arratsaldeko berenduan gazta guztiak jan ziren, eta haurrendako txokolatada ere izan zen. Horrez gain, Agerraldek bere musika doinuekin bazterrak alaitu zituen.