Kadete mailako Espainiako atletismo txapelketak jokatu ziren ekaineko lehen asteburuan Zaragozan eta joan den urtean bezala, 300 metroko lasterketan urrezko domina lortu du Ane Petrirena 15 urteko sunbildarrak.
Iaz ere Espainiako txapeldun izan zen modalitate berean. Gainera, 1989tik indarrean zegoen marka haustea lortu zuen, 40 segundo eta 82 zentesimako denborarekin. Aurten, kadete mailako bere bigarren eta azken urtean oraindik marka hobea egin du, 40 segundo eta 19 zentesimatan egin baitzituen 300 metroak.
Beraz, aurten ere Nafarroako marka gaindituta lortu zuen Espainiako txapelketa irabazi eta urrezko domina golkoratzea (40:19). Valentziako Andrea Verduk eta Gaztela-Mantxako Herminia Parrak osatu zuten podiuma.