Martxoaren 3az geroztik, 309 partida jokatu dira Josetxo Ezkurraren XXI. Memorialean eta sei kategoriatan banatuta, 286 pilotarik hartu dute parte Txaruta Pilota Elkarteak antolatutako txapelketan: 28 pilotari ttikien mailan aritu dira, 64 umeetan, 66 lagun kimuetan, 42 haurretan, 54 kadeteetan eta 32 gazteetan. Nabarmendutakoek finalak ekainaren 3an jokatu zituzten.
Ttikien mailan, Elizondoko Oihan Obregozo eta Ibai Ballarenak 18-10 irabazi zieten Oronoz-Mugairiko Miren eta Txomin Altxuri.
Umeen B mailan, Lesakako Aritz Otxoteko eta Asier Larralde tanto bakarragatik nagusitu ziren, Andoaingo bikotearen kontra. A mailan, berriz, Arbizuko bikoteak 18-8 irabazi zien Elizondoko Unax Apeztegia eta Zubiriko De la Fuenteri.
Kimuen B mailan, Ultzamakoak nagusitu ziren, 18-17, Lazkaokoen aurka. A mailan, Usurbilgo Aranguren eta Igantziko Telletxeak 18-8ko markagailuarekin irabazi zuten Zizurko Arribillaga eta Goizuetako Antton Apezetxearen aurka.
Haurren B mailan, 18-15 Oiartzungo bikoteak irabazi zien Larraintzarko Andoni Gaskue eta Elizondoko Aritz Merinori. Eta A mailan, Andoainera joan zen txapela, Oronozko Enaitz Antso eta Sunbillako Iker Espelosinen kontra 18-17 irabazi zutelako.
Kadeteen B mailan, 18-7 nagusitu ziren Etxekolonea zubietarra eta Saldias urroztarra, Uharte eta Ultzamakoen kontra. A mailan, Iruñera joan zen garaipena, Narbarteko David Albiasu eta Elizondoko Sergio Oskozi 18-9 irabazita.
Gazteen mailan, azkenik, 18-10 irabazi zuten Arkaitz Untxalo iturendarrak eta Joseba Apeztegia iruritarrak. Andoaingo bikotea izan zuten kontrario.
Sari banaketan Barriola, Asier Olaizola, Otxandorena eta Apeztegiak parte hartu zuten.