Hamabostean behin, TTIPI-TTAPAn, Ezkurran egiten diren jarduera, proiektu eta lanen berri ematen dudala aipatu didate hainbat herritarrek, baina aspaldian ez dudala eskolaren gaia landu, gehienek bere egoera okerrera doala dakitenean. Gaiari buruz norbaitek ezer ez esateko eskatu ote didan ere galdetu didate. Eta hori ez da horrela. Udala arazoari aterabidea emateko egiten ari den urrats guztien berri badut, baina krisi larri honekin zaila da lortzea. Horretan ari dira. Duela bi urte eman genuen Udalaren proiektuaren berri. Zenbaitek horren kontra protesta egin zuten eta bilera ere eskatu zuten, eta eztabaida sortu zen. Onena biak elkartu eta adostasun batera ailegatzea zela iritzi nion. Batzuek Udalaren jarrerarekin bat egitea leporatu zidaten, baina ez nuen sekula hori egin. Liskar eta ezinikusietan oinarritutako jarrerak interes orokorreko gaietatik aldentzearen aldekoa naiz. Zoritxarrez, ordukoak zapore txarra utzi zuen eta ez zen ezerrekin adostasunik lortu.
Ezkurra, herri berezia liburuan, eskolari eskainitako tartean ageri denez, ikasle faltagatik 1999an itxi zuten eskola eta erabilera posibleak aztertzea interesgarria izanen litzatekeela irakur daiteke: bilera gela liburutegi batekin eta ordenagailuekin, aterpetxea, elkartea... Horregatik, eraikina moldatzeko aukera zein den aztertzeaz gain, erabilera egokiena zein den ikustea litzateke egokiena.
Ehiztari elkarteko prestaketak
Txantxangorri Ehiza Elkartea hasi da denboraldi berria prestatzen eta altak eta bajak emateko epea zabaldu du. Ekainaren 30era arte izanen da aukera. Ondotik, urteroko asanblada eginen du eta diru-sarrera eta gastuez hitz eginen dute. Ehiza-postuetarako bideak eta horiek egoera onean paratzeaz ere ariko dira, besteak beste.