Eskualde honetako hainbat herritan, gazteak mugimendu edo talde ezberdinetan antolatuak daude. Guttitan izaten da, ordea, haien berri, edo norberak bere herriko berriak bakarrik ezagutu ohi ditu. Hori dela eta, eskualdeko gazte batzuk bildu eta egoerari buelta emateko helburuarekin, proiektu berria paratu dute martxan.
TTIPI-TTAPA aldizkaria eskualdean barna banatzen dela aprobetxatuz, eta gazte edukiak sartu nahian, aldizkariko atal bat gazteei eskainia izanen da hemendik aitzinera. Gazte Oihua izenpean, inguruko gazteen berri eman nahi dute.
Horretarako, Gazte Oihua proiektua aitzinera eramaten ari diren gazteak dagoeneko harremanetan jarri dira hainbat herritako gazteekin. Haien helburua herrietako edozein gazte mugimenduk (gazte asanblada, gaztetxea, aisialdi taldea…) atal honetan tokia izatea da. Denengana ailegatzea zaila dela eta, e-posta sortu dute: ttipigazte@gmail.com. Lerro hauen bidez, proiektua lantzen ari direnek deia egin nahi diete eskualdeko gazte taldeei haien berriak bidal ditzaten, gero eskualde osoan zabaltzeko.
Atal honen maiztasunari dagokionez, ez dute zehaztu hamabortzean behin aterako ote den ala ez. Hasiera batean bederen, herrietako gazteak artikuluak bidali ahala argitaratuko dituzte.
Berako Gaztetxeak sei urte
Sei urte bete ditu aurten Berako Kaxerna Gaztetxeak eta horren harira, ospakizunen astea izan zuten ekainaren 4tik 10era. Txalapartariak, bertsolariak, antzerkiak, ipuin kontalariak, gaztetxoentzako ekintzak, hitzaldiak, ping-pong eta mus txapelketak, presoen aldeko topa, kalejira, kontzertuak, bizikleta salto erakustaldia... Gazteentzat ez ezik, gainerakoentzako ekitaldiak ere egin zituzten.