Ikasturte honetan, hamabortz urte bete ditu Mendi Abesbatzak eta koroko kideek ez dute ospatu gabe utzi nahi izan. Hori dela eta, larunbat honetan, ekainak 16, emanaldi berezia eskainiko dute elizan, 20:30ean hasita. Abesbatzako kideez gain, Agorreta Musika Eskolako ikasle eta irakasleak, Erreka Dantzari Taldea eta Mendi Abesbatzako zenbait kide ohi ariko dira eta emanaldia borobiltzeko, urte hauetan guztietan bildutako argazkiekin osatutako bideo bat erakutsiko da estreinakoz. Egitarauari dagokionez, hamabortz urteotan abestutako doinuak biltzen saiatu dira, tartean Polifoniako zenbait kanta eta hainbat folkloretako doinuak: Xalbadorren Heriotzean, Baratze bat, Sarasolaren Pater Noster, A Tu Lado, Kitolis, Herribehera zein Goizian Argia Hastean... Horiek entzuteko aukera izanen da, bertzeak bertze. Eguna behar bezala akitzeko, partaide guziek afaria eginen dute.