Udalaren mugapean dauden aisialdirako eta elkartzeko lokalak arautzen dituen ordenantzari behin betiko onespena eman diote. Kultura, aisia, josteta edo antzeko asmoekin jendea biltzeko erabiltzen diren tokiak dira, irabazi asmorik gabekoak eta eremu pribatu hutseko jarduerak egiten dituztenak. Eraikinen beheko solairuan daude eta ez dira ostatua, sukaldea, jatetxea edo gisako zerbitzuak sartzen. Ordenantzarekin lokal horiek erabilzeko baldintzak zehaztu ditu Udalak.
Lokal barrenean plastikoa, kartoia, koltxoiak edo su hartzen eta sua hedatzen laguntzen ahal duten gaiak pilatzea debekatua egonen da, baita salerosketan aritzea ere. Ezin dira sukaldea edo jakiak prestatzeko tresnak eduki, eta 18 urtez azpikoetan alkohola eduki edo kontsumitzea debekatua dago, baita drogen legez kanpoko kontsumoa eta trafikoa ere. Ibilgailu eta oinezkoen bidea trabatuz, eremu publikoan altzariak nahiz edozein elementu ez dira onartuko, ez hots maila gainditzea ere.
Arau-hauste arinengatik 300 euro arteko isuna paratzen ahalko da, arau-hauste larriengatik lizentzia bi hilabete arte kendu edo 300-600 euroko isuna paratu eta hagitz larriak bada, lizentzia kendu akatsak zuzendu arte edo 600-1.200 euroko isuna paratu.