Elkarretaratzeak herri gehienetako eskoletan, asanblada iraunkorrak Berako Rikardo Baroja eskolan, Doneztebeko ikastetxean eta Elizondoko Lanbide Eskolan, itxialdiak Ricardo Barojan (50 lagun), Elizondoko Lanbide Eskolan (27 lagun) eta Doneztebeko San Migel eskolan (15 lagun), kotxe karabanak greba egunetan, greben segida haundia eta Iruñean egin diren mobilizazioetan partehartze zabala.
Maiatzaren 28, 29 eta 31ko greba egunek segida zabala izan zuten eskualdean, ikastetxe gehienak guttieneko zerbitzuak eskaini baitzituzten. Nafarroa iparraldean maiatzaren 31ko grebaren jarraipena, erraterako, sindikatuek «erabatekotzat» jo zuten. Egun horretan arlo publiko osoan deitu zuten greba eta eskualdeko udal eta mankomunitate aunitzetan bat egin zuten grebarekin eta osasun arloko zenbait langile ere murrizketen aurka azaldu ziren.
Bertzalde, ekainaren 5ean Lekarozko enpresa kanpuseko eraikin berria inauguratzera etorri zen Lourdes Goikoetxea Nafarroako Gobernuko kontseilaria eta ederki aditu eta ikusi zituen Baztan, Bortziriak, Malerreka eta Bertizaranako ikasle, irakasle eta gurasoen protestak, jendetza elkartu baitzen murrizketen aurka Lekarozen egindako protesta zaratatsuan.