Mikel Gartzia mendizale iruindarra Perun hil da mendiko istripu batean, Ausangate mendikatean, Cusco inguruan. Eskalatzera joana zen Tafallako Ana Mari Lopez emaztearekin, eta astelehenean goizaldeko 04:00etan elur jauzi batek harrapatu zituen kanpin dendan lotan zirela. Gartziarekin mendiko laguntzailea hil zen, Nosy Dueñas. Lopezek, ordea, bizirik ateratzea lortu zuen, beso bat elurretik kanpo gelditu zitzaiolako eta erreskatze zerbitzuak ohartarazi zituen. Berak eraman zituen istripua gertatu zen lekura.
Mikel Gartzia Lopez de Sabando Malerrekako euskara teknikaria zen; Donezteben egiten zuen lan. 40 urte zituen. Gartzi deitzen zuten gertukoek. Iruñean bizi zen, Donibane auzoan. Hamabi urte zeramatzan Malerrekako euskara teknikari. Tartean, bi urteko eszedentzian izan zen, Nafarroako Parlamentuan itzultzaile lanetan aritzeko.
Ezbeharrak nahigabea eta samina sortu du batez ere Malerreka inguruan, aski ezaguna baitzen Mikel ikastetxeetan eta euskaltzaleen artean.