Naia Lacroix euskal presoak utzi egin dio gose grebari, Frantziako espetxe arduradunek bakartze egoeratik aterako dutela erran diotelako. Maiatzaren 14an hasi zuen baraua, Bordeleko kartzelan, eta orain Dijongora eramanen dute laster. Hau da, isolamendutik ateratzearen truke Euskal Herritik oraindik ere gehiago urrunduko dute presoa. Haren egoera salatzeko preso batzuek eta herritarrek mobilizazioak egin dituzte. Erraterako, hamarka lagunek parte hartu zuten maiatzaren 22an Lacroixen egoera salatzeko Herrira mugimenduak antolatu agerraldian. Bertze hainbat hautetsirekin batera, Christine Bessonart auzapeza izan zen.
Euskal Herritik 850 kilometrotara dagoen espetxe horretan ez dela orain arte euskal presorik izan oroitarazi zuten agerraldian. Beraz, Lacroix bertara eraman eta gero, beste euskal preso bat mugitu beharko dute Dijon-era, Senpereko presoari emandako hitza bete nahi badute. Janine Beyrie Etxerat elkarteko ordezkariak ez zuen ezkutatu espetxe agintariek kasu honetan hartu duten erabakiak zapore gazi-gozoa uzten duela. «Beste bi familia ehunka kilometro egitera behartuak direla» nabarmendu zuen. Isolamendua eta urruntasuna baliatzen dituen politika horrekin bukatzeko ezinbertzekotzat jo zuen auzapezak bezala, «beste tokiko hautetsiek engaiamendu har dezatela bidegabakeria honekin bukatzeko». Emilie Martin Herrira mugimendukoak, berriz, «presoak Euskal Herrian lehenbailehen batzea eta dispertsio politika onertezinarekin ez segitzea» galdegin zion frantses estatuari.
Bessonart auzapezak Euskal Herriak bizi duen «itxaropen garaian» horrelako jokabideak ulergaitzak egiten zaizkiola aitortu zuen. Naia gazteari dagokion errugabetasun-presuntzioa aldarrikatuz, «baretze aldera» keinuen beharrean gaudela uste du Euskal Herriko Hautetsien Biltzarreko buru ere den Bessonartek.