Herri Urratsen irabaziekin Kanboko ikastegia haundituko dute

Babel dorrearen itxu­ra hartu zuen berriz ere ain­tzirak maia­tzaren 13an. Izan ere, 29. He­rri Urratsen, frantsesa eta gaztelaniaz gain, kolore guztietako euska­rak en­tzun ziren euskal­tzaleak lurralde guztieta­tik eto­rri­ baitziren. Eguna be­har­ bezala ospatzeko, ur­te osoan bezala milaka antolatzaile-laguntzaile lanean aritu ziren xinau­rriak bezala. Hauen artean ziren, bertzeak ber­tze, Serge Zudaire Zuzu zuraidarra eta Jean Louis­ Bessonart senpertarra. Biei eskerrak eman ziz­kieten 25 urtez Herri Urra­tseko elkarteko kide­ eta buru izan baita eta hastapenetik aparkalekuez arduratu baita, ber­tzeak bertze. Aipagarria da, duela zonbait urte Bibix Jean Louisen andereak egindako lana eskertu zutela Herri­ Urra­tseko antolatzaileek.

Herritarren ondoan, kolore ainitzeko haute­tsiak agertu ziren ikasto­len alde, hauen artean, Frédérique Espagnac senatari sozialista, Lurdes Auzmendi Eusko Jauralaritzako hiz­kun­tza politi­karako sail­buruordea, Lo­hizune Txarola Gipuz­koako Batzar Nagusieta­ko presidentea, Max Bri­sson UMPko kidea, Txaro Goi­kolea EAJ-PNBko arduraduna, eta Tasio Erkizia Ezker Abertzaleko kidea, bertzeak bertze. Ekitaldi ofizialean, Fran­txoa Maitia Akitania­ko presidenteorde sozialistak azpimarratu zuen aro berria sortu dela gure min­tzairarentzat Iparraldean François Hollande Fran­tziako Errepublikako presidente berriak hiz­kuntza gutxituen eurokarta berretsiko duela hitz eman baitu. Ber­tzal­de, baxoa, unibertsitaterat sartzeko azterketa frantsesez izango da beti Seaskako ikasleen­tzat, baina historia geogra­fiaz gain, aurten, lehen aldikoz, matematika ariketa ere euskaraz­ egiten ahalko dute.

He­rri Urrats besta zoragarria izan da aurten ere baina zoritxarrez gertakari hits batek ilundu du. Izan ere, Angelu­ko 23 urteko gazte bat larri­ki zauritu zen urerat jauzi­ egin eta kolpe txa­rra­ hartu ondoan. Baionako ospitalerat eraman zuten helikopteroz eta bertan ebakuntza egin zioten baina iduriz paralizatua egon daiteke. Bere hurbilekoek diote goizegi dela zerbait erra­teko. Orain, heldu den urtean ospatuko den 30. He­rri­ Urrats prestatzen ari dira. Euskaltzaleek lekukoa eman diete Biz­kai­ko lagunei Ibilaldia ekainaren 3an ospatuko baita Trapagaranen, BIlbo ondoan.