Espainiako Gobernuak Hezkuntzan egin nahi dituen murrizketak Nafarroan indarrean paratuko direla iragarria du Nafarroako Gobernuak eta neurri horien kontra mobilizazioak egiten ari dira Nafarroako ikastetxe publikoetako langileak. Sindikatuen gehiengoak hiru greba egun deitu dituzte eta horietan lehenbizikoa maiatzaren 22an egin zuten.
Sindikatuen arabera, %75ek baino gehiagok bat egin zuten lehenbiziko greba egunarekin, aldiz, Nafarroako Gobernuak erran zuenez, %48,8koa izan zen. Ikasle eta gurasoek ere babes haundia eman zioten irakasleen lanuzteari. Manifestazio jendetsuena Iruñean egin zuten, 12.000 lagunetik goitik parte hartu baitzuten sindikatuen arabera. Eskualdeko ikastetxeetako irakasle, guraso eta ikasleak ere Iruñean izan ziren. Eskualdean, LABen arabera, Doneztebeko eskolan grebaren jarraipena %80koa izan zen eta institutuan %85ekoa; Saldiasen %50ekoa eta Bera, Lesaka eta Oronozko eskoletan %100ekoa; Leitzako institutuan %93koa izan zen eta Berakoan %52koa.
ELAren arabera, eskola hauetan egin zen greba Baztanen. Arraiozen hiru irakasletik bik egin zuten; Elizondoko Lanbide Eskolan 27tik zazpik; San Francisco Jabier eskolan 31tik seik, Erratzun lautik batek; Iruritan 11tik seik, Lekarozko institutuan 64tik 29k, Zigan bitik batek eta Zugarramurdin zazpitik batek.
Protesta gehiago
Maiatzaren 22ko greba egunarekin batera, 29koa eta ortzegun honetakoa, 31, dira hezkuntzako sindikatuek deitutako bertze bi greba egunak. Gisa berean, hilabete honen 24, 25 eta 28an Hezkuntza Sailaren aitzinean elkarretaratzeak egin dituzte, eta eskualdean, ikastetxez ikastetxe protestak egiten ari dira egunero ez bada asteko egun gehienetan.